马贯东近日无辜卷入李家争产风波之中，传出其母系李家鼎前女友，事件冇影响到马贯东嘅日常，见佢如常投入工作同佢最爱嘅兴趣，最近仲帮好友张振朗带嚟嘅爱宠美容扮靓。
张振朗近日开始投入拍摄新剧，趁住仲未太忙碌就带咗一对狗狗去揾圈中嘅宠物美容师兼好友马贯东，帮一对小狗扮靓，感觉焕然一新之后，振朗当然要同马贯东嚟个合照啦。
呢个Post一出咗最搞笑嘅系振朗同一班好友嘅对话，赖慰玲随即问振朗点解唔剪埋，振朗幽默话今日只系自己去剪发，唔系两只爱犬剪，Winki继续玩嘢问咁佢带两只狗去做咩，振朗再玩大啲话「系㖞，应该带你两个仔嚟」，单凭佢哋嘅对话，可以感受到两位好朋友平日嘅相处有几玩得。
振朗同Winki斗嘴一轮后，就到黄翠如加入话好想带只狗去畀马贯东美容，振朗随即帮手拉客，仲大赞马贯东服务好、照顾周到，笑言自己都想俾佢剪。事实上马贯东除咗演艺工作投入认真之外，自从升呢做宠物美容师后，唔少圈中人成为佢嘅客户，好似佘诗曼、江美仪、陈滢、陈炜、郭晋安等有揾佢帮宠物扮靓，为其打响招牌。
有眼明嘅人反问振朗几时养咗只狗，翻查振朗嘅社交平台又真系唔见佢同呢对小狗互动嘅踪影，不过振朗贯彻幽默作风话上天安排俾佢。
