修哥 胡枫 以94岁高龄再次刷新自己创造嘅世界纪录，星期日下午于红馆举行《修哥九五至尊无限枫骚演唱会》，今次佢仲特别安排，希望入场嘅老友记睇完骚可以返屋企食晚饭，所以改为下午开骚。
早前有指今次修哥演出，黄牛票价竟炒高3倍，中午修哥出席拜神仪式时，就笑指早知自己收起一叠飞慢慢卖，贯彻佢嘅幽默作风呀。下午开场前多位好友已经先后现身红馆，现场亦有大批花篮祝贺修哥再次开骚。
除咗多位相识多年嘅好友之外，唔少老友同政经界人士都有捧场，好似陈法蓉同爸爸、保安局局长邓炳强夫妇、TVB行政主席许涛夫人陈祉妤、高永文医生夫妇、李丞责夫妇、颜米羔同妈妈等都系座上客。
舞台两侧设有10围酒席，多位好友都先后到台上同修哥合唱，好似 陈松伶 周柏豪 陈百祥 肥妈 「中声家族」嘅 张与辰 刘洋 黄博 同「声秀三甲」冯熙燮 柯雨霏 同 胡子贝，仲有 BIG FOUR 杨千嬅 汪明荃、罗家良、薛家燕，仲有早前先完成出道40周年演唱会嘅 草蜢 莫文蔚 陈奕迅 先后上阵，Eason更指自己登场修哥毫不知情。 
而两大契仔 张家辉 同 张学友就于演唱会末段现身，两人一个就叫修哥公开同罗兰姐如幻似真嘅「情史」，一个就同契爷斗舞，非常百厌，亦令台下笑声四起。
健力士世界纪录人员，于现场宣布修哥以「举办演唱会最年长的华语艺人」挑战，以94岁又140日挑战成功，嬴得全场观众掌声，而 刘德华 此时亦一身招牌牛仔楼打扮上台，与全场一齐为修哥欢呼，最后完美完成呢次长达4个半小时嘅破纪录演出。
