资深演员 陈敏儿 于6月12日因病离世，终年66岁，佢嘅儿子 廖文哲 及 廖文信 透过社交平台公布噩耗，并透露安息礼会遵照妈妈生前意愿，以私人形式低调举行，仅限亲友同家属参与。据知敏儿喺呢个星期嘅身体情况唔乐观，所以佢嘅朋友亦相继到医院探望，为佢打气。
敏儿喺去年十月、65岁正日生日当天，喺社交平台上载咗一张坐喺窗前望风景嘅照片，透露自己身体出现严重状况，并已喺6月进行紧急大手术，不过，敏儿当时并未有交代病因，只系话自己系一个慢性病患者。
而敏儿喺2025年接受我哋《TVB娱乐新闻台》访问时，对于自己嘅病情表现得好正面，当时佢表示自己度过咗最惊险同艰难嘅时间，身体康复中。
藉生日，敏儿亦宣布启动网上频道《好好生活》，佢首支影片，就透露自己于2024年10月举行咗「生前告别会」，以积极态度面对人生无常，同时好珍惜呢次机会，好好去答谢每一位，因为佢知道好好道别系非常重要，减少分离嘅遗憾，佢形容当晚系充满爱同正能量，而喺片中敏儿亦透露近两年身体状况越来越唔理想。
我哋亦联络到敏儿生前好友 贾思乐 ，Louis得悉噩耗后心情非常悲痛，无法回应，但愿敏儿能够喺天堂，同丈夫及儿子团聚，获得安宁同幸福，并会深深怀念佢。
敏儿1979年入读第八期TVB艺员训练班，当年凭住清丽脱俗口嘅气质同正面嘅形象，火速上位成为当家花旦，更以第一女主角嘅身份参演多部剧集，而佢最后一部参演嘅影视作品，就系1992年播出嘅剧集《爱生事家庭》。除咗拍剧之外，敏儿更凭住淡定同极佳嘅口才，担任过唔少节目嘅主持，绝对系一位全能嘅女艺人。
1987年敏儿同喺艺员训练班嘅同学 廖启智 结婚，结束8年爱情长跑，婚后敏儿诞下三子，佢更甘愿放低如日中天嘅演艺事业，专心相夫教子，同智叔更系圈中公认嘅模范夫妻。
2006年，幼子廖文诺因血癌离世，令敏儿大受打击，更一度患上严重抑鬰，甚至萌生轻生念头，最后敏儿同智叔一齐跨过难关，重新振作。2021年，敏儿经历丈夫智叔胃癌病逝，呢次敏儿选择乐观面对，更投身生死教育，成为导师，虽然同丈夫天人永隔，但敏儿不时都喺社交平台发文思念亡夫，好似喺2024年敏儿就喺两人结婚纪念日上载婚照，并解构当年㨂11月11日成婚嘅意义，系取一生一世，一双一对嘅意义，可见两人夫妻情深。
