方力申（Alex）继7年前成功挑战45公里环岛泳写下历史后，今日正式宣布再闯深海！小方将于今年11月以大使身份，挑战35公里慈善泳，所得筹募善款将用于为基层及有特殊教育需要嘅儿童及青少年提供平等参与体育机会，让更多小朋友透过运动建立自信、发掘潜能，勇敢追梦。
相比起7年前嘅环岛泳，小方近年人生最大转变，就系成为新手爸爸，小方坦言而家做任何事都以家庭为中心，时刻为阿女打算，亦希望阿女长大后，能够睇到爸爸曾完成呢个慈善挑战， 以身作则回馈社会。
小方日前与几位受惠于该体育基金嘅小朋友一同拍摄宣传片，现场展现满满父爱，期间小朋友更化身「小主持」，对佢连环发问有关参加奥运、创办游泳学校及港澳游挑战等问题，现场充满笑声及温馨气氛。小方大赞小朋友天真可爱，同时谈到对阿女未来嘅期望，就系希望阿女健康快乐地成长就够。
回想2019年挑战环岛泳时，小方有父母、家人及朋友全力支持。时隔数年，今年小方以丈夫及爸爸嘅身份，小方笑言：「当太太知道我要参加呢次挑战，佢第一个反应系表示『晕船浪』，所以唔会喺船上陪我游泳。」小方话太太要留喺屋企照顾囡囡，而父母年纪也比7年前大，因此唔希望家人舟车劳顿：「只要佢哋能喺岸边安心等待我平安归来，就已经系最好嘅支持。」至于他自己的身心准备，小方直言随著年纪增长，过去凭满腔斗志同雄心迎接挑战，但呢次佢会注重保持体力，按部就班，全力以赴完成挑战。|
小方想透过呢次挑战向年轻一代传递一份信念：「今次港澳慈善游，我都担心自己未必一定能完成，因为当中有太多未知嘅挑战。但只要相信自己，坚持努力面对呢啲挑战，就能够一步步克服困难。同样地，小朋友或年轻人喺生活同学习上也会面对许多未知同困难，只要肯踏出第一步、肯坚持，就一定能破浪前行。」
是次港澳慈善游全程35公里，由香港大屿山鸡翼角出发，横渡海域至澳门黑沙海滩。挑战预计历时约9粒钟，途中需面对海流、风浪、潮汐及天气等多变且难以预测嘅环境，对体力、耐力、意志力及临场应变能力都系一大考验。小方表示：「今次港澳游嘅距离虽然比7年前嘅环岛泳短，但我哋呢次要游出公海，更必须连续横跨三个地理及水流性质截然不同嘅水域，对体能与应变能力带嚟极致考验，加上公海有许多未知因素，因此挑战比环岛泳更大。过去6年我主要系喺在泳池训练，以速度为主，呢次系游海，要加强耐力，练习长距离游泳，锻炼肌肉耐力。平时练习时间可能系半粒钟至一粒钟，而家会逐步增加到两、三个钟。不久将会安排长距离训练，目标游十多至二十公里，为完成呢个35公里嘅慈善游做好准备。」