蔡康永 以艺术家身份现身台北一个画廊活动，佢分享早前喺东京首次举行画展时嘅趣事。康永哥表示，其实好多到场嘅都系佢同小S主持嘅综艺节目《康熙来了》忠实粉丝，所以大家都向佢问候小S，令佢都自称自己系小S嘅「接线生」。
不过近日台湾传媒刊出有关大S遗产分配嘅连串报道，令小S同徐家相当头痛。康永哥就话：「我只能一直对小S保持关心与支持，没有多问。」亦指无意追问及介入人哋家务事。但佢亦大方分享自己已经立好遗嘱，认为呢件事并非唔吉利，反而可以提醒自己，人生中最重要嘅第一位系边个，而佢嘅第一位就系家人。
康永哥相识满天下，佢每次搞画展都会收到圈中好友嘅花篮道贺，喺最近嘅东京画展除咗有小S嘅花篮，仲有五月天阿信、周杰伦及昆凌。而每次康永哥开展，都有粉丝要求买走偶像花篮上嘅花牌，往往大家嘅目标都系小S，所以更诞生「买画送花牌」传统。
不过呢次就唔系小S嘅花牌被最先被买走，而系阿信，康永哥亦向小S讲返呢件事，小S就话自己可以排第二，点知第二块被买走嘅花牌系属于刘若英嘅！
另一件引人注目嘅事，就系大家喺康永哥分享嘅花篮相上发现言承旭、林志玲呢对昔日情人「同框」，康永哥笑言，当初做拼图相时自己都犹豫过，所以最终将两张相拉开少少距离放，而自己都同咗志玲讲，志玲嘅态度都好大方。