资深电影人 施南生 7月13日离世，享年75岁。据知丧礼已经低调举行，而为咗纪念施南生喺影坛举足轻重地位，家人亲友8月2号喺湾仔一间酒店举行追思会。前夫徐克一早到场打点安排，又为施南生制作一段生活影片喺场内播放，与挚亲共同怀缅施南生。
众多圈中好友巨星到场参与悼念仪式，包括周润发夫妇、成龙、梁朝伟、刘嘉玲、洪金宝、钟镇涛夫妇、谭咏麟、甄子丹夫妇、林子祥叶蒨文、林青霞、张艾嘉、曾志伟、钱嘉乐、黄子华、霍启刚、向华强夫妇、霍启刚等，接近3小时嘅追思仪式完毕之后，徐克同林青霞代表向传媒发言。
林青霞对挚友离世感不舍，颂赞施南生一生对电影界嘅贡献以及为人，一本书都写唔完，特别系佢对朋友掏心掏肺，施南生喺医院最后日子，家人同朋友都每日陪伴，而青霞同徐克更24小时轮流陪喺施南生身边，佢指施南生喺爱包围下安详离开，又特别感谢由世界各地前来嘅每一位好友，青霞视施南生为「永远的家人」，相伴在侧四十四年早已视对方为一家人。
徐克亦代表施南生感激各界，特别系三位音乐人包括罗大佑、伍佰、卢冠廷写歌献予施南生，而徐克亦凭歌寄意吐心声，自己创作咗一首歌送俾天上嘅施南生，而纪念网站亦存放大量施南生生前嘅生活照片，等大家可以怀念往昔。
