TVB处境剧《爱·回家之开心速递》本周一至周五晚八点翡翠台播映结局周。 8月3号𠮶集「后来的我们」，「安Bon」感情线终于迎嚟结局，「金城安」周嘉洛一边压抑对「Bonnie」林凯恩重燃嘅爱火、一边努力营救被软禁喺吴旺达嘅「葱头」丘梓谦，救出葱头亦意味住安仔与Bonnie「假婚姻」将要结束。
安仔想出各种古灵精怪理由拖延办理离婚手续，被妈妈熊尚善一言惊醒，安仔决定放下过去、约见Bonnie「离婚」，并送上最真诚却又最揪心嘅祝福，「原来大个仔唔单止要学识承担，仲要学识放低唔属于自己嘅嘢」、「其实我幻想过好多次点同你结婚，但我从来冇谂过要同你离婚」、「结婚𠮶阵锡一啖，离婚𠮶阵又有个Goodbye Kiss，咁对我哋嘅婚姻嚟讲，都叫做有始有终」，安仔收起平日轻佻、一面情深，向旧爱送上最成熟嘅祝福，Bonnie一脸感动，强忍泪水哽咽回应：「咁我都祝福你，金城安，以后都要幸福快乐，多谢你安仔。」
一连两集《爱‧回家》让观众睇到安仔喺呢10年间暴风成长，安仔离婚后对妈咪熊尚善讲嘅一番话：「Bonnie心入面已经有葱头，我同佢又已经过去咗，既然已经过咗去，就唔应该望番转头，有啲嘢错过咗就由佢错过啦。」
「安Bon」呢番感人嘅互相祝福，令剧迷既伤心又感触，一夜之间爆起连番「安Bon集体回忆」，唔少网民赞废青安终于大个仔，指「安Bon」呢个结局唔烂尾，戏如人生，有时错过咗就系错过咗，留下遗憾先至系最好，放手其实都系一种爱。代入「安Bon恋」嘅网民，指出金城安遭遇，与蜘蛛侠Peter Parker有得挥，力推周嘉洛系港版蜘蛛侠最佳人选。
虽然「安Bon」因Timing问题未能喺埋一齐，但编剧仲努力为安仔寻找「好归宿」，以及「满满的爱」，负责送爱就系安仔老Best朱凌凌及「刀子嘴豆腐心」嘅熊尚善。
朱凌凌拎住两碗象征「Bonnie对安仔照顾」嘅八爪鱼肠仔蛋面，闯入安仔房间，安仔见状后极感动捉实朱凌凌问：「Can you take care of me forever？」朱凌凌闻言爽快回复：「我话咗我养你吖嘛！」期间不忘来个忘情拥抱，兼含住啖面开心互动，网民亦大为感动，纷纷为「安凌Broship」喝采。
