资深演员兼殿堂级填词人 黎彼得 于8月5日病逝，享年76岁。据知黎彼得今年初入住护老院，三月因中风晕倒，一直卧床休养，身体机能逐渐衰退，最终与世长辞。
黎彼得儿子 黎树德 及好友 钟志光 于6号会见传媒交代其后事安排，钟仔指按照家人意愿想低调处理，澄清黎彼得并非经济唔掂，二人相识以嚟，对方未向佢借过一毫子，黎彼得当时冇主动揾「大刘」刘銮雄资助，而系刘銮雄透过基金会主动伸出援手，并引述刘生嘅说话，指对方系好欣赏黎生喺经典电影《小男人周记》饰演「大古惑」一角，觉得黎彼得值得帮助。钟仔话黎彼得后事安排由家人商议中，一切都尊重家人意愿，希望各位畀啲空间佢哋去处理。
黎彼得于2021年突然因心脏血管堵塞，紧急接受「通波仔」手术，旧年佢又因感染流感导致呼吸困难，入深切治疗部留医，期间医生更发现佢贫血、糖尿病，肾功能指数过高，出院后仲瘦咗十几磅。
面对庞大医疗开支，黎彼得经济陷入极大危机，契仔 黄宗泽 主动出手相助解困，令黎彼得相当感动，大赞Bosco有情有义。 虽然身体大不如前，但黎彼得仍然有开工，并转战做网络节目主持，经常喺节目中大爆陈年娱圈秘闻，后来佢嘅健康状况反复，节目曾暂停更新，喺旧年12月，更揾嚟好友钟志光帮手一齐主持，而最后一次出片系今年6月11日，片中所见佢身形消瘦，精神尚算唔错，仲同钟仔讨论世界杯话题，虽然有指呢条片系黎彼得中风前预录嘅内容，却成为佢演艺生涯谢幕之作。 
黎彼得一生充满传奇色彩，只有小五学历，12岁开始打工养家，做过洗厕所、司机等基层工作，后来凭住佢嘅才华，成为一代填词巨匠。黎彼得获「歌神」许冠杰赏识，两人合作无间，联手打造咗多首贴地又反映香港基层心声嘅经典金曲《浪子心声》、《打雀英雄传》、《梨涡浅笑》等。
许冠杰得悉故友黎彼得离世后，亦有喺社交平台，上载咗一张亲手写嘅悼念文，多谢故友为香港乐坛创出无产数精彩嘅作品。黎彼得曾为当时乐坛天王天后打造多首金曲，好似张国荣嘅《Moncia》、梅艳芳嘅《将冰山劈开》、谭咏麟嘅《天边一只雁》、罗文嘅《激光中》等。 黎彼得一生共创作咗 300 多首作品，佢更同黄沾、卢国沾、郑国江并称为「香港第一代四大词人」。 
黎彼得喺90年代有唔少幕前演出，经常喺TVB剧集演活咗无数小人物角色，深受欢众喜爱，近年黎彼得喺《爱・回家之开心速递》演豹叔一角，更系令人深入民心，佢同刘丹、罗乐林、陈荣峻三位老戏骨共同组成耆英 Hip Hop 组合大四喜。
