「年年25岁」嘅「校长」 谭咏麟 8月23日踏入76岁，下月即将迎接演唱会嘅佢，连日来在紧密运动备战之余，亦获圈内外大批好友先后为佢举办饭局欢度生日月。校长喺社交平台分享同唔同好友嘅庆祝片段，不过当中最瞩目同星光熠熠嘅，莫过于早前被指因球队经营理念不同而传出反目嘅老友「阿叻」陈百祥现身破冰喇。
校长同阿叻分别于网上公开嘅影片可见，有娱乐圈「福禄寿」之称嘅谭咏麟、陈百祥同曾志伟久违同框合照，阿叻唔止现身祝贺，仲同校长搭晒膊头肩并肩合唱名曲《朋友》，众人高声齐唱、场面温馨，彻底破除近年不和传闻，一唱泯恩仇。阿叻亦特意于影片公开多张两人珍贵合照，大骚数十年深厚情谊。
派对上另一焦点，就落喺「拉姑」狄波拉身上，自前夫 谢贤 早前离世后，拉姑一直保持低调，今次可算系佢自四哥离世后首度公开现身，影片只见拉姑状态心情不俗，亲自到场之余合照亦带笑意。
