校长谭咏麟喺76岁正日生日为快闪店揭幕，心情大靓嘅校长以一句多谢回应阿仔谭晓风（Howard）有冇返港陪庆祝，同时大方承认阿仔已有女朋友，仲赞个女仔几好。
呢日有大批歌迷到场支持，更送生日利是畀寿星，校长话今年生日愿望系世界和平，呼吁大家注意环保。校长为咗演唱会Keep Fit，积极瘦身减磅，推咗超过三十个聚会，唔敢太放纵，校长笑指得失咗好多朋友，始终都有十、八个呢几日埋到身，而家距离目标重量只差5磅左右。
校长话之前有段时间跑街，有时遇上大雨、天气又好热，校长有中暑嘅感觉，讲到早前跑山时险被车撞，校长笑言早已听到车响咹，有及时让路，问到𠮶度变咗「校长湾」有冇人特意去撞佢，校长幽默问：「撞我系咩意思，系偶遇吓话。哈哈，我仲以为松踭撞我添！」
校长话喺跑步径都同过唔少人影相，计唔到时，成日都要停一停。一向圈中人缘极好嘅校长，话就算加一、两场都追唔到飞债，不如开目前场数，大家开开心心就算啦。