《中年好声音4》登峰之战星期日晚举行，七强参加者郑家声、蔡宓婕、尹景顺、吴亦伟、许云妮、尤淑情同许美琪经过首回合嘅快、慢歌竞争后，最后由评审加上观众投票，结果由尹景顺、许云妮同郑家声杀入最终回合，三人以必杀歌决战，最后由尹景顺夺冠，而许云妮同郑家声就分获亚同同季军。
赛前已被视为大热嘅尹景顺，唱完快歌后已先获快歌MVP，以及观众至爱好声音两奖，最后更成为赛事三料冠军，佢更指今次参与系人生最幸运嘅事，而登峰之战对手们表现更极佳，感激大家对佢嘅包容同支持。
亚军由大马唱将许云妮夺得，季军就系由加拿大返港追梦嘅郑家声。事后三甲成员分别发表感受，景顺补充要多谢Fans支持，而家声就话本来谂住无缘得奖，所以宣布三甲名单时自己吓一跳，至于云妮亦对自己成为亚军非常惊喜，更以黐咗线形容自己心情。
嘉宾评审 巫启贤 一开始就以98分高度赞扬尹景顺嘅《百年孤寂》，更形容佢演出无懈可击，各方面都非常唔错。佢更预计往后《中年好声音》如继续举办，将吸引更多大马同世界各地歌手参加竞争，仲话节目系属于全华人世界呀。李克勤 身为另一嘉宾评审之余更即场为大家献唱，佢就话一直支持《中声》，而现场直击更感受到参加者嘅热血，佢仲话尹景顺快、慢歌都驾驭力十足，非常有感染力又自信十足。
呢晚中声三代冠军，以及主持 车婉婉 于开场时一齐上台，佢仲爆原来当日同克勤倾谈后先有信心成为主持，台上公开多谢克勤后水煲自然又水滚，婉婉仲回忆当日收到邀请后请教克勤夫妇嘅往事。
呢日 许美琪 同 尤淑情 表演慢歌时先后发生失误情况，睇住佢哋海选至今嘅 肥妈 就直认戥两人不值，至于战友 周志康 同 陈旭培 就一样戥佢哋可惜呀。
虽然台上失准，不过两人到后台就获师兄师姐鼓励打气，认为两人已经尽力无愧表现喇。而佢哋本人都话失误源于自己唔小心呀。
