胡定欣 近日正式推出首支个人单曲《未知也好》，新歌打造出充满温暖与疗愈感作品，希望鼓励大家成为大人后，偶尔冒失迷路亦无妨。新歌已于各大音乐平台上架，MV亦已首播。 过往定欣曾演唱多首剧集歌曲，而今次新歌由概念到内容都源自自身经历同想法，令佢可以由心出发诠释。作品源于佢过往与fans交流时感受嘅生活点滴，加上近年观察到身边唔少人于生活中面对迷惘同未知。
佢以自己参加歌唱比赛入行、随后于演员路上不断发掘自我并获得认同嘅经历为例，亲身证明人生道路往往出乎意料，希望借由作品给予大众陪伴同力量。 定欣坦言今年以歌手身份推出歌曲非常开心，同时感恩过去演艺经历：「我嘅演员脑好套用到喺《未知也好》上面，当初单纯钟意唱歌嘅我，完全估唔到自己会成为演员，仲喺演戏入面发掘到自己、得到大家支持。而家有机会出自己嘅歌，可能先系最好嘅时机。」
为展现歌词中追寻初心嘅意境，定欣重返位于薄扶林嘅母校拍摄MV：「新歌开头讲读书时嘅状态，对我嚟讲，唱歌就系我嘅初心，所以谂都唔谂，第一个画面就系觉得一定要返小学母校去拍。我小学𠮶阵已经好钟意唱歌，有参加合唱团，学校弥撒又有做领唱，最钟意就系上音乐堂。今次企返喺学校大礼堂嘅舞台去拍，好似返去自己嘅初心去睇返自己。」
除咗感谢学校借出场地拍摄，佢亦感谢校方安排两位小师妹参与演出，代表佢唔同成长阶段嘅写照。MV又透过其他故事情节传递「无论处于任何年纪或阶段，都要勇敢迈出一步去追梦」嘅讯息。更邀请咖啡品牌创办人Max参与演出，定欣指自己被Max由零开始勇于尝试的精神打动，认为正系新歌希望带俾大众嘅鼓舞。