张智霖以代言人身份，出席月饼期间限定店开幕礼，再次续约成代言人，今次Chilam加码参与埋电视广告剧情构思，为咗答谢fans到场支持，Chilma冒雨将老婆月饼派畀fans享用。
Chilam日前喺广州开骚，囝囝 魔童张慕童 担任结他手，以一头短发示人嘅魔童，颜值旋即成为网民焦点，作为爸爸嘅Chilma就话自己劝囝囝剪短头发好耐，仲话阿仔个短发look好好睇，又拍如果自己剪短发，同魔童真系几似样。不过讲到魔童个样似太太袁咏仪，Chilam就即时柠檬精上身调头就走，仲再三强调魔童系似佢。
Chilam指魔童学咗结他6、7年，喺呢方面有一定嘅造诣，但实战嘅经验而家有机会就累积下，至于囝囝系咪想入娱乐圈发展？Chilam就话唔知道，不过实战后囝囝会知自己有咩不足，希望佢会进步，同埋知道有不足时，会去学返佢需要学嘅嘢。
8月27号就系Chilam嘅55岁生日，现在唔少fans都手持生日手幅为偶像送上祝福，讲到生日愿望，Chilam就表示希望世界和平，佢唔希望再见到战争，因为作为父母，唔忍心见到战乱中小朋友嘅画面。
有份主演嘅《璀璨之城》进入后期制作阶段，佢就指知道新剧大概会喺年底播出，自己因为配音嘅关系都有睇到部份剧集，坦言相当值得期待呀。