71岁「大姐明」林建明于8月12号突然喺社交平台晒出卧病在床嘅AI生成图片，宣布因健康抱恙暂停工作，引起圈中好友及大批网民关心，休息咗一段时间，大姐明日前拍片报平安，并写「感恩得到大家给我的爱！❤️😘 VL 康复了！🎉🎊💐」。
大姐明于8月26日喺社交平台上载影片报平安，片中见大姐明精神奕奕，企咗喺码头嘅餐厅位置，面带笑容表示：「报平安！报平安！8月头生病，经过成个月治疗慢慢康复，而家OK啦，可以出动嘞！好多谢大家一嚟就问候我，同埋挂住我，好多嘅祝福，Thank You.Yeah!」
大姐明先系双手合十感谢好友及网民连日嘅关心，片尾更双手举V，流露「出关」嘅兴奋心情。大姐明早前晒出一张身处医院，鼻插氧气喉、手背插针、病床旁放满药物由AI生成嘅图片，并写上「早日康复」，未有透露具体病因，只透露要专心休养，令一众网民吓咗一跳，一度传出大姐明健康亮起红灯，而家见到大姐明上载嘅近照，唔少网民赞大姐明状态一流，见到大姐明咁精神就放心晒喇！
