阿Bob林盛斌、张驰豪（Aska）、冼靖峰（Archie）及钟嘉欣（Linda）一齐现身慈善篮球赛活动，Aska同Archie平日有保持运动，但眼见一班专业球员喺场内热身，佢哋都话唔敢献丑，Aska笑言被球员撞一撞都会飞到十丈远，Archie话好耐未试过全部场中嘅球员都比自己高一个头。
Archie近日为接拍新剧积极操体能，见到身边嘅Aska有咁弗嘅体态都好羡慕，原来佢有向Aska取心得，得到嘅秘诀就系刻苦、自律同戒口，而呢啲都系最难做到嘅事。
阿Bob即将举办个人talk骚，完成球赛活动，佢就会正式闭关，阿Bob话要养声、背稿同休息，务求最佳状态企上台。阿Bob话仔女们都好乖，冇话要扭出街，知道爸爸要专心准备上台开骚。
Linda今次返港忙里偷闲跟朋友聚旧，同昔日拍档黄宗泽合体勾起回忆，大家都期待二人重现萤光幕，不过Linda话要视乎剧本同角色，加上而家任何事都要同老公商量，Linda话拍剧机会微啲，因为时间太长，开骚就会易啲，最多只要飞返港几日就可以。
