陆浩明（6号）与女友陈诗欣（Ayan）爱情长跑14年，多年嚟感情稳定，不时出埠度假大解放，6号早前同女友去马尔地夫旅行，今日佢喺社交平台贴出一辑海滩浪漫求婚照，二人甜蜜互动满溢著幸福与恩爱，女友更大方晒出求婚钻戒。
相中见6号与女友陈诗欣喺北马累环礁一个度假村，享受浪漫烛光晚餐前，6号喺金黄色嘅夕阳下，喺沙滩向女友求婚，陈诗欣全程含情脉脉望住6号，隔住mon都能够感受到求婚成功嘅喜悦！
6号开心分享求婚影片并写道：「Yeah! 我求婚成功 我会用一万倍嘅努力，让妳幸福快乐❤️ 求婚时听到你天使般嘅笑声令我最甜蜜感动 以后嘅日子，你会成为我最幸福嘅家人 遇上妳系我一生最大嘅礼物 Love You 小公主💕」
准新娘陈诗欣难掩内心嘅激动，双手遮住嘴巴，眼神里闪烁出被求婚后嘅惊喜与感动，无名指上嘅钻戒喺晚霞映衬下，格外耀眼。二人喺镜头前，展露灿烂笑容，另一张相见陈诗欣含情脉脉望住未婚夫，6号亦温柔咁回望，眼神尽是宠溺，夜幕低垂时，二人一边享受烛光晚餐、一边深情对话，沉浸喺专属于佢哋嘅二人世界当中。
6号拍拖以嚟屡次被身边好友催婚，6号曾多次讲过希望喺经济更稳定，有能力置业「上车」后先考虑结婚，畀女友一个安稳嘅家，而今个月初，6号透露自己要搬屋，原来已筑起爱巢。
