洪永城（Tony）同老婆梁诺妍（Inez）育有大女Amber及细女Beryl，一对女儿同Tony饼印一样，超级得意。细女现年已经两岁几，妈妈Inez最近喺网上公开一条剪辑片段，分享Beryl出生后几个月，右眼下方确诊患上血管瘤嘅经过及治疗。
医学上血管瘤俗称士多啤梨痣，最初Inez发现Beryl眼下嘅红印时，仲以为系刮伤所致，后来部位开始深色决定去求医，确诊患病后就转介去公立医院展开一年嘅医治，女儿年纪少少，喺疗程中已接受咗八次激光治疗，期间父母Tony和Inez都陪伴在侧。
片中见小小嘅Beryl喺床上脚撑撑，经医护整理，熟睡后先可以进行疗程，虽然真正打激光时间不足一分钟，对于喺门外等候嘅父母嚟讲，心情一定既纠结又漫长。
每次完成治疗后，Beryl眼下贴上一块小小纱布，Tony则伏喺床边凝望住女儿，睇得出佢心痛又担心，之后妈妈Inez就温柔地抱住Beryl安慰，幸好一年嘅疗程已经顺利度过。Inez将过程纪录同网民分享，感谢医疗团队贴心帮助，呼吁父母如发现小朋友有呢个情况唔使太担心，谨记及早求医。
