Liza姐汪明荃于8月28日踏入79岁生日，向来敬业嘅阿姐喺生日前都马不停蹄工作，日前先现身古天乐演唱会，之后又过大海为好姊妹张德兰澳门骚担任嘉宾，阿姐日前作客电台节目访问时，更罕有谈及对生育嘅睇法。
阿姐日前接受节目访问时，被问对于冇生小孩有冇毕生遗憾，阿姐坦言冇，并罕有地深情剖白内心世界，重提过去一段人生难忘经历，「我曾经有次小产咗，之后就冇再有喇」，而整个对答过程中，阿姐秉持住坚定且冷静嘅一贯作风，睇得出佢对呢件事早已释怀。
阿姐喺节目中透露现今养育孩子压力沉重，尤其教育先系重中之重，并坦言自己性格冇耐性，亦唔钟意教人，认为自己嘅精力有限，好难将教育子女呢件大事做到最理想。
虽然膝无儿女，但阿姐早已觅得幸福婚姻，同老公罗家英结婚17年，一直婚姻美满，幸福早已超越一切，家英哥除咗爱锡阿姐，幽默性格亦不时氹得阿姐非常开心。啱啱79岁嘅阿姐近日展开连串庆祝活动，早前就同契女沛妍食生日饭，老公罗家英当然陪在身边啦！
