陆浩明同拍拖14年嘅女友陈诗欣（Ayan）终于踏入人生新阶段，8月28号， 6号喺社交平台宣布喺马尔代夫向女友求婚成功嘅喜讯。
6号撰文分享喜悦，承诺用一万倍嘅努力，让陈诗欣幸福快乐。6号晒出多张同女友嘅甜蜜合照，将大大粒钻戒展示喺镜头前，仲有喺写上「will you marry me」嘅心形蛋糕前合照，不过最闪嘅当然系6号喺画有巨型爱心嘅沙滩向女友求婚片段，两人流露住幸福笑容。
6号透过语音向观众分享喜悦，先系多谢大家嘅祝福，原来佢花咗几个月去筹备求婚之旅，知道Ayan好钟意浪漫，特意拣选咗马尔代夫呢个地方，由出发到求婚一刻都超级紧张，本来准备咗好多情深说话想讲，但最后求婚一刻一片空白，只记得拎住戒指讲「你愿唔愿意嫁俾我」，之后听到ok同好，就完成咗过程。6号求婚后都有向肥妈报喜，仲话呢杯新抱茶一定唔少得肥妈。
肥妈得知呢个喜讯当然高兴到不得了，但就搞笑表示点解唔早啲求婚，金价现时好贵，但唔紧要，最重要系一对准新人幸福愉快，终于娶到新抱仔。圈中好友汪明荃、区永权、朱千雪、冯盈盈、汤洛雯等都纷纷留言祝贺。
