邬友正之前喺节目《魔音女团》担任校董，呢日就为佢创办嘅品牌拍摄一共十集，每集两分钟嘅微短剧，呢次邬生仲会处男下海客串演出兼为微短剧献唱主题曲。
邬生做生意就话难唔到，呢次要一次过解锁咁多新体验，一样系难唔到邬生，邬生仲兴奋地表示：「难以置信，我第一次拍TVB呢个剧啦，以前从来冇谂住拍，咁今次会拍嘅原因，因为我系海马牌创办人，咁我觉得我有责任同海马宣传，所以今次咁好机会畀我宣传，难得TVB畀我做，所以就好兴奋，好想做呢个剧。」至于有大冇担忧自己做唔嚟？邬生就话佢做嘢都唔会惊，加上佢话对自己要求好低，做得唔好唔紧要，但千万唔好浪费机会。
邬生之前胆粗粗参加《中年好声音4》，虽然喺海选止步，但系并冇淋熄佢对唱歌𠮶团火，呢次佢又卷土重来，接受唱主题曲嘅挑战，佢话由于练歌时间好急，只有14日时间，加上自己又患上流感，只可以带病练歌，仲话自己以前冇唱开歌，仲形容自己系「超级魔音」，所以练歌时曾经觉得好挫败，成日觉得自己唱唔好，后嚟佢谂通咗，同自己讲尽力去唱，唱得好就一曲成名，唱得唔好都无所谓。
而呢日拍摄现场，仲见到魔音女团MYNT一班靓女，有佢哋喺度，成个片场都充满欢笑同活力，而等埋位𠮶阵，邬生仲特登嚟探班同佢哋打气添。
