戴祖仪花六位数购心头好名表 工作太忙未有时间应酬追求者

戴祖仪日前现身钟表展活动，本身对钟表有一定认识嘅Joey，介绍表款时驾轻就熟，原来佢本身有收藏名表习惯，而第一只名表仲好有意思，因为系佢钟意嘅颜色同出产年份撞啱系佢出生年份。

Joey自爆花咗六位数购入心头好，佢话自己当时年少轻狂，唔识储蓄，误打误撞原来表系会升值，不过佢唔会放售呢只咁有意义嘅表。Joey虽然开完通宵工先出席活动，依然精神奕奕，佢解释系因为新剧《驱魔速递》有好拍档吴伟豪、周嘉洛同陈晓华，大家几眼瞓都不停搞笑，佢话最搞笑嘅系周嘉洛，因为佢无时无刻都瞓得着，甚至幕后转机位时，佢企喺度都瞓得着。

Joey近排工作可谓忙过不停，真系连瞓觉嘅时间都冇，不过佢都好识得奖励自己，一有时间就叹美食，佢话自己最大乐趣就系食嘢，问到有冇人陪佢一齐食？佢话自己好忙，都冇时间识人，可能要到明年先有时间同人沟通，呼唤追求者再等吓。