苏志威呢日出席活动，虽然今年5月正式「登六」，但佢保持人老、心不老嘅态度，乐活人生，最近仲初尝长者搭车优惠。
苏志威话有日同朋友聚会后，饮咗酒冇揸车，司机又放假，于是喺马路上见到架111巴士就跳咗上车，记得一嘟系2.4元，司机同佢对一对望，似乎认得佢系苏志威，之后就好顺利咁到上层最前一格坐低。呢个场景令苏老板勾起少年回忆，以前最钟意坐巴士上层第一格擘大个口食风，觉得好舒畅。
苏老板囡囡Yumi近日开设首间实体快闪限定店，成为新一代「苏老板」，生意业绩几亮眼。见囡囡事事亲力亲为，苏老板虽然感到欣慰，但睇到囡囡咁攰都好心痛，因为阿女每日喺店舖做到凌晨一点半，第二日大清早又返舖头。苏老板曾经化身最强爸爸，有次本来想去接阿女收工，点知阿女话未得，仲要清洁厨房先走，苏老板就落手落脚一齐帮手，虽然整蛋糕就帮唔到手，但作为爸爸认为关怀陪伴就系最好嘅助力。
