罗天宇向来被外界封为「女神收割机」，近年修心养性，情倾「东张女神」陈懿德（德德）。二人曾同游埃及、日本等地，初期一直对外宣称系朋友，天宇近期受访时，大方承认二人关系稳定，8月14日更被网民发现佢哋喺红馆睇完骚，天宇揽实德德离场，可见二人爱得甜蜜！
天宇早前以「狮子王」身份参加TVB歌唱选秀节目《中年好声音4》。绯闻女友德德喺比赛期间，亲自到台下现身打气，恋情越嚟越高调，多次被影到甜蜜互动，又喺社交平台上隔空放闪，㖊日有网民喺社交平台上载影片，见天宇同德德并排步出红馆，表现得相当亲密。
片中见天宇搭住德德手臂，二人行走时身体贴近，步伐显得协调自然，完全沉浸喺彼此世界当中，同行仲有好友黄建东。天宇同德德走到熙来攘往嘅街头，二人准备行过马路先刻意分开行，可见二人即使恋情逐渐浮面，私底下仍习惯保持一定程度嘅警觉。
