《夫妻的博弈》林漪娸与张颕康饰演「Cheap精母子」衰格得嚟又超搞笑，其无赖、贪小便宜形象演绎得深入民心。毕竟恶人自有恶人磨，8月28号播出𠮶集，「野蛮奶奶」林漪娸就遇上「贪钱阿妈」黎燕珊，二人豁出去「真打」，喺公司大堂大打出手，更波及无辜嘅张颕康。
呢集讲「贪钱阿妈」黎燕珊想喺女婿身上「攞著数」，撞正亲家「野蛮奶奶」林漪娸，二人火星撞地球，喺公司大堂当众开火，黎燕珊扯林漪娸头发，林漪娸就疯狂拍打及起脚攻击，战况激烈，张颕康喺劝交𠮶阵，被黎燕珊踢中「上五吋下五吋」，林漪娸见阿仔受伤，再度冲向黎燕珊肉搏，郭柏妍情急之下，咬住林漪娸嘅手臂，闹剧虽然平息，却令婆媳关系急速恶化。
制作组喺社交平台上载「片场秒变格斗擂台🥊🤣」幕后花絮，见黎燕珊同林漪娸呢场「动作戏」比拼演技之余，仲比拼武术，场面一度失控，连导演都笑到停唔到，原来黎燕珊同林漪娸埋位前，已沟通好系唔留力「真打」，黎燕珊笑言拍完呢场戏后，肌肉足足酸痛咗一星期，而林漪娸亦打到太攰，双脚突然抽筋，要导演上前为佢按摩，二人咁瞓身演出，难怪观众睇得过瘾又肉紧啦！
