荷里活「狂人」 汤告鲁斯(Tom Cruise)再次挑战极限，拍戏向来以「搏命」著称嘅佢，过往于《职业特工队》系列多次亲身挑战徒手攀悬崖、于飞机外飞翔等危险动作，甚至于《壮志凌云：独行侠》中亲自驾驶战斗机。
呢位年逾六旬嘅型佬依然毫无退意，正式宣布将为佢1990年主演嘅经典赛车电影《雷霆壮志》(Days of Thunder)拍摄续集，并暂定2028年暑假上映。
今次佢将同荷里活女神 安妮夏菲维(Anne Hathaway)合作，两人同步于社交平台发文，上载于NASCAR赛道上嘅合照，为呢部36年前大作续集预热。今次型佬汤将再扮演经典角色「Cole Trickle」，继续于赛道上挑战极速；而同佢首度合作嘅安妮夏菲维则打破以往形象，饰演年少有为嘅赛车队老板兼工程师，两人于竞速赛场上并肩作战。
提起1990年嘅《雷霆壮志》，最令人津津乐道嘅莫过于系型佬汤同前妻 妮歌洁曼(Nicole Kidman)嘅定情之作。当年两人戏假情真，后来更步入婚姻殿堂，成为90年代荷里活最瞩目嘅金童玉女。
尽管早已年逾花甲，不过型佬汤对亲身挑战极限嘅执著似乎仍未减退，外界关心佢会否于新片中再次亲自驾驶赛车冲锋陷阵，而更有消息指出，身为男主角嘅佢早已做好实战准备，令人更为期待新作。
