周殷廷 一连两场《The Alchemist Live 2026》演唱会尾场周六晚圆满结束，YT分享当年参加选秀节目被淘汰嘅「黑历史」片段，更邀请当年评判 杜德伟 担任嘉宾。Alex笑言怕被「寻仇」，场面爆笑。
YT一开骚就连献唱《上场》、《Killa》同《小姐你好》三首快歌，仲霸气叫观众：「全部同我起身！」璞迷亦响应挥动着萤光棒疯狂舞动。同时担任个唱导演嘅YT，拍摄多段短片穿插演出之中。献唱多首歌曲后，佢喺台上话：「欢迎大家来到….」话口未完就连中几鎗，电影感演出令观众哗然。
YT早年曾参加台湾选秀节目《超级星光大道》，现场亦播出比赛片段，YT分享当年只身赴台比赛感受，更坦言唔敢翻睇影片，更觉得自己当时好失败。
佢话当时系首次参加公开比赛，晋身百人初选，当日心情惊慌，结果等足8小时就唱得30秒，被淘汰后爆喊，非常怕自己无机会再唱歌。之后再唱出当年参赛歌曲《我要好好过》。他坦言想了很久如何分享自己的故事，如何分享埋藏心中好脆弱及不敢跟人讲的感受，很开心今次跟大家分享。
YT失败故事仍有后续，佢于后台见到其中一位评判离开，更㩒住对方嘅车话：「你好呀！我叫周殷廷，我想话比你知我系第100个，我终有一日我会成功做歌手。」当时对方回应话：「好呀，你加油！」YT指失意时有好多人鼓励，对方声音非常重要，更感谢对方担任嘉宾，此时杜德伟缓缓升上台，两人合唱一曲《无心伤害》。
Alex由外地专程赶返港现身，YT就对佢讲：「有句说话我想亲口同你讲，I get my promise！」Alex就指：「能成为你嘅版图其中一块非常荣幸，当日有几多人话唔钟意你，讲咩都好，上到台都系你自己功劳。」
YT再笑问当日点解会被淘汰﹐Alex就笑言：「今日原来唔系揾我做嘉宾，系寻仇。我话唱《信自己》，后尾话唱《无心伤害》，即系话我无心伤害咗你！你依度全部都系你嘅歌迷，冧我好大镬！」
大萤幕再重睇当日比赛画面，Alex就见到自己原来无份淘汰YT：「我有眼光，有撑你㗎！咁靓仔跳舞又好睇，又性感，又胸肌又腹肌，真系唔简单㗎！见到你张相我都流口水呀！」
YT又亲手送上新专辑予Alex感谢，Alex笑说：「我想讲返件事！当日周殷廷带咗个电影剧本来揾我，隔几日佢打嚟问我做唔做佢演唱会嘉宾。死啦！如果我唔做嘉宾，咪冇戏拍？所以我应承咗你啦！」
而唱毕《三生有幸》一曲后，YT又分享趣事，佢指早前收到一个讯息，指老公好钟意听自己唱歌，希望于婚礼献唱《三生有幸》。YT笑言：「婚礼唱有啲奇怪，佢就系Michelle(卫诗雅)，今日我好朋友周师兄(卫诗雅老公)都有嚟！最后我系唱咗《My Everything》嘅！」 到演唱会尾声，YT分享过去叩门求当歌手嘅档案，当中有旧相片，更有过去嘅肌肉照，最后以从未曝光新歌结束尾场演出。
