《2026香港小姐竞选》圆满落幕，决赛夜台上佳丽表现精彩，一众表演嘉宾同司仪们都好戥12位佳丽紧张，首次挑战港姐司仪嘅马国明对自己嘅表现好满意，尤其系讲「转头见，同出年见」完全冇搞错，更自封喺几位司仪中系男神摆设。萧正楠笑言听讲台庆都会揾返佢哋三位做司仪，马明即刻怕怕表示都系「转头见，同出年见」。阿萧同曹永廉嘅上衣同样开胸，被马明取笑佢哋同港姐抗衡。
梁汉文同郭柏妍、陈桢怡、谢淑怡联手表演音乐剧气氛激昂，唔知Rosita系咪面对唱歌紧张得滞，其中一幕Edmond拖住Rosita唱《七友》时，Rosita突然疑似自踩裙摆差啲出事，好彩得到Edmond嘅拯救先避过一劫，令Rosita都好惊险话：「好多谢Edmond，如果唔系就会突然间有个白色嘅嘢跌咗喺台到。」
李幸倪同师弟曾比特分别率领佳丽上演歌舞，阿Gin已经第二度担任港姐嘉宾，佢觉得呢晚表演嘅歌曲好贴合港姐主题，期待下次成就解锁晋级做司仪。
魔音女团成员中嘅宋宛颖、倪乐琳同庄子璇都系港姐冠军，佢哋都冇谂过会以女团身份重踏港姐舞台，睇见一众师妹们嘅演出都觉得好特别，Hilary最欣赏12位佳丽喺冬雪主题嘅泳衣环节，显现不一样嘅性感姿态，而Sabrina同Ellyn则最钟意佳丽刺激辩论，认为可以考到佢哋嘅急才，又不失友谊先最难能可贵。
另外喺比赛前无线集团有限公司行政主席许涛，率领一众管理层踏上红地毡，仲有历届港姐嘅师姐盛装打扮嚟睇骚，几位有份担任今年港姐外景嘉宾嘅大师姐冯盈盈、黄嘉雯、陈懿德都高贵优雅现身为师妹打气。
早前德德被网民捕获同罗天宇恩爱睇骚，令两人恋情浮面，德德大方甜蜜回应拍拖消息，自揭两人感情稳定，唔介意情侣档工作揾钱。
