《2026香港小姐竞选》决赛12位佳丽经过才艺同口才考验之后，最终由芳龄26岁嘅 1号 袁丝珩 夺得冠军，亚军得主系 8号 邓匡闵，而 2号 李泽欣 除咗夺得季军之外，同时获选为「最上镜小姐」，而「友谊小姐」就由 3号 李澄晴 夺得。
无线集团行政主席 许涛 赛后为得奖佳丽颁奖以及送上祝贺，佢赞 袁丝珩Bernice 喺问答环节答得好好。全晚表现亮眼嘅Bernice，喺第一个单字考验环节中已经先声夺人，能够登上冠军宝座佢都话唔敢相信，直言宣布赛果时自己系一片空白、难以置信，当下所有情绪一次过涌晒出嚟。
至于讲到最满意嘅部份，佢都指单字环节，畀自己嘅反应吓亲自己。而 邓匡闵 亦表示好难以置信，因为佢话冇谂过自己可以入到三甲，仲话入到四强时已经好惊讶，仲话好戥冠军Bernice高兴。
而被视为大热嘅李泽欣仅得季军，问到佢觉得自己输蚀咗喺边？李泽欣即时发挥口才，指觉得自己冇输，而系其他佳丽更优秀。夺得「友谊小姐」嘅李澄晴，就感谢大家畀呢个奖佢，仲话自己系代表大家夺得呢份友谊。
谢天华 伍允龙 苟芸慧 同 陈美龄 四位最上镜小姐评审，大赞佳丽门水准高，而整晚嘅赛果都系佢哋嘅心水之选。Bernice嘅父母全程睇住囡囡嘅表现，赛后仲第一时间分享感受，袁爸爸赞囡囡够淡定，讲嘢冇㪐㩿，而袁妈妈就因为囡囡公开道歉而搞到眼湿湿，袁妈妈就话希望囡囡可以喺TVB发光发亮，享受属于佢嘅舞台。而当Bernice返到屯门嘅住所，一大班同事好友就拎晒应援物喺现场等候送上祝贺，而未有到场嘅朋友，都有写低字仔祝贺，见到呢班最强后盾，Bernice都忍唔住落泪。至于讲到父母因为自己嘅说话而感动落泪，Bernice就话醉时大家比较内敛，好少将「Love You」呢啲说话挂喺口边。
而经过一晚嘅休息，四位出炉港姐就返到电视城会见传媒，Bernice表示仍然难掩兴奋心情，邓匡闵话赛果出炉后，自己电话入面有成500几条短讯，到第二朝都未覆完。而李泽欣就指朋友们有录低佢嘅演出再send返畀佢，不过佢就仲未得闲回复大家呀。李澄晴就指自己赛后同家人去咗食辣蟹庆祝。
