林盛斌（Bob）喺澳门正式展开世界巡回栋笃笑首站，为咗配合主题「搏命」，阿Bob就以拳击手装束现身，仲瞓身演出三项需要经过专业训练嘅惊险特技动作，不过大家最期待当然系佢幽默又贴地嘅港式笑话。
阿Bob回顾自己嘅奋斗史，并以14字座右铭总结多年来嘅高低起跌「襟捞、愿做、无投诉、肯挨、肯博、肯蚀底」，佢觉得人生公路长路漫漫，只要肯坚持、肯付出，目标明确，一定会走出属于自己嘅路。 除此，Bob又化身苦主，分享生活喜感，大谈追债奇观同令人好嬲又好笑嘅奇人奇事。Bob精辟拆解夫妻关系同男人间嘅日常互动，大爆看似满载爱意、实质全部废话嘅幽默对话，精辟金句连发。
演出尾声，Bob带嚟压轴惊喜，佢将日本经典剧《阿信的故事》主题曲重新改编为《信》，大萤幕亦即时首播歌曲MV。Bob喺MV里面化身各行各业，并喺管弦乐团现场伴奏下，以动人歌声唱出不屈不挠嘅阿信精神，借此鼓励大家学懂向命运说不。
