马国明呢日竟然撇低萧正楠同曹永廉两位好兄弟，单飞走咗嚟成都同当地粉丝见面，其实呢次fan meeting本身系喺八月头举行，但当日天气问题而被迫延期，呢晚总算顺利举行，马明同粉丝都过咗一个好开心又难忘嘅一晚呀！
马明过去以「一歌走天涯」闻名，近年苦练唱歌，呢日深情献唱《爱情影画戏》、《发现》同《当我知道你们相爱》，明显唱功跃进。
马明首次喺成都举行粉丝见面会，自爆之前曾担心冇人嚟，但呢晚见到全场座无虚席，马明觉得好感动，仲话有粉丝而家26岁，呢位粉丝8岁时已开始睇佢嘅剧集，而有啲粉丝仲带埋囡囡嚟撑场，得到咁多朋友多年嘅爱戴，马明亦好感恩啊。
马明难得同成都粉丝见面，佢好尽力用港式普通话同大家倾下偈，马明话自己嚟到成都，有品尝呢度嘅口水鸡，自爆自己唔食得辣，但有次喺四川拍剧时，放饭见到碟碟菜都系辣，只有白饭系唔辣。
