邬友正为佢创办嘅品牌拍摄一共十集，每集两分钟嘅短剧《魔幻百变床褥》，邬生同太太翁嘉穗、有份演出嘅《魔音女团》MYNT成员，以及一众台前幕后，呢晚约埋一齐食饭睇首播，大家都睇得好开心，邬生见到自己嘅演出，仲兴奋到拍晒手。
邬生呢次又拍剧又献唱主题曲，佢话要一圆梦想，背后要有好大勇气同决心：「我以前系唔唱歌，同埋系唔钟意唱歌，咁我71岁𠮶年，我发觉原来唱歌对身体好好，咁就开始唱歌，越唱觉得唱歌越好玩，就一路唱落去，咁就好难得TVB畀机会我唱首主题曲，咁唱完主题曲，我觉得我完全踏出第一步。」
邬生仲话歌词内容好似讲紧佢人生前半段嘅心路历程，令佢勾起好多昔日回忆。邬生又表示拍剧时，曾经有后悔一刻，因为佢话自己做工厂，点解要嚟拍摄搞到自己又尴尬又怕丑，后嚟谂通一点，就系佢身为品牌代言人，系有责任同品牌宣传，无论拍出嚟嘅效果好与坏，佢都唔介意。
邬生呢次成功解锁新体验，佢嘅自信心指数直线上升，呢晚佢仲抛出另一个震撼弹，就系佢想有朝一日举行巡回演唱会，佢好希望成为「歌坛姜子牙」，能够喺80岁踏上启德舞台开骚。除咗邬生有咁大突破之外，魔音女团几位靓女喺剧中亦都大晒演技，不过佢哋个个都话冇压力，仲话拍得好过瘾添！
