周殷廷一连两场嘅红馆演唱会圆满落幕，首次踏上红馆舞台嘅YT，呢次更出动私伙电单车，并以闪爆嘅银黑色Jacket型爆登场。
YT首场就请嚟好友Tyson Yoshi做嘉宾，而嚟到尾场，佢就揾嚟前辈杜德伟（Alex）撑场，YT邀请Alex做嘉宾，原来系因为YT未出道时，曾经喺台湾参加选秀节目可惜被淘汰，当年Alex就系其中一位评判，YT请Alex嚟并唔系寻仇，反而要报恩。事关当年有三位评判畀咗「X」YT，唯独Alex冇按掣，YT大赞Alex识货。
YT谂起当年被淘汰后，曾经沮丧到喺后台喊，之后喺街上突然见到Alex，YT冲上前向对方表示「我就系头先第100名选手，我个名叫周殷廷，我想同你讲终于有一日，我一定会成为歌手」，YT表示嚟到今日，佢感激Alex畀佢机会完成呢个旅程，成为拼图上最后拼图，令YT觉得成件事好圆满。
YT事业得意，感情生活一样都咁得意，好似呢两晚YT嘅女朋友都有嚟捧场，以行动送上支持，YT话冇刻意收埋女友，身边朋友及粉丝都知佢拍拖，对于记者问到点解唔喺红馆求婚，YT就笑指记者太进取。
