第三届香港「Global 6K for Water」明年1月10日于西九文化区再度展开， 陈国邦 童星 徐立德 同YouTuber柿柿 一同为活动担任大使，早前佢哋已拍摄宣传片同海报。
向来喜爱跑步嘅「李斯」陈国邦，早前于个人社交平台以影片记录240公里街跑过程，而成为呢次活动大使佢认为系非常巧合嘅缘份。孩童时期曾经历过香港制水嘅佢话：「个个家庭一到供水时间，就尽量攞唔同器具装多啲水。𠮶时我住唐六楼，每次攞水都要上落六层楼梯，无论对大人定小朋友，体力消耗都系最大嘅难关。」佢仲话如果每日都要为食水担心，已经系生存问题。
佢坦言城市人生活已经比较幸福：「如果有呢类型嘅新闻，我都会畀下一代知道，我哋而家拥有嘅，有几咁幸福。」更笑言如果可以号召全港艺人拎水桶跑六公里作宣传，相信能令更多人关注缺水问题。
而有逾20万订阅嘅YouTuber柿柿，希望能善用自身影响力，传递有价值讯息：「我了解咗呢个活动背后点样直接改善小朋友生活𠮶阵，就好想同大家一齐参与、体验。今次系一个好宝贵嘅机会，畀我实实在在落场，感受𠮶啲缺乏妥善水资源嘅非洲居民系点生活，希望可以令大家更关注呢个全球水资源嘅问题。」
柿柿期望透过亲自挑战6公里路程，令观众隔住萤幕，都感受到呢份重量：「六公里呢个距离好巧妙，唔太长又唔太短，系大家都有能力完成嘅目标！」
