许美琪 喺《中年好声音4》赛事中，以第7名完成整个旅程，经过个多星期嘅沉淀，美琪喺社交平台发千字文，以《感言篇》为题，感激10个月来各界嘅鼓励支持，亦自觉整个过程似坐过山车一样，但无论结果如何一切都值得。
美琪先多谢老公支持追梦，正因老公一句想喺决赛见到佢，佢先每一轮拼尽全力。仲有远道而来港见证佢踏上舞台嘅亲戚朋友，千言万语都表达唔到对大家嘅谢意。
美琪又话已经多谢过银老师好多次，但无论讲咗几多次，佢都觉得唔够。佢仲感激幕后嘅工作人员，为呢个节目付出咗无数嘅时间同心机。同样Donald老师同Live Band嘅伴奏，令美琪觉得自己呢个素人都有难得嘅体验。
另外，美琪亦多谢 车婉婉、评审们给予嘅鼓励同宝贵意见，令佢进步，亦多谢 郑衍峰 嘅悉心照顾。仲有 黄博 喺决赛后给予美琪拥抱同倾偈，令喊到失控嘅佢平复情绪，美琪为此都特别感激师姐。
讲到要多谢嘅人，美琪亦唔会漏咗一班支持佢嘅粉丝，佢话自己系一个普通女仔，冇谂过会有咁多人认得佢，亦因为大家，令佢有正能量去继续唱好每首歌畀大家听。
最后，佢感激一众《中声4》战友，佢话「由一开始到依家，我哋成为咗朋友，一齐度过咗美好嘅回忆。希望我哋有时间，大家再聚一聚。」美琪表示会继续留喺香港发展自己嘅歌手事业。
