8月底去咗加拿大登台嘅陈山聪，先后踏足温哥华、多伦多、蒙特利尔三大城市，当地粉丝相当热情，更为山聪大派利是，山聪都话今次收到嘅利是比佢当年结婚收嘅人情仲要多呀﹗除咗登台之外，热爱跑步嘅山聪，当然都有趁空档喺当地练跑，三哥苗侨伟同太太戚美珍，仲化身半个东道主，陪佢一齐跑步。
难得嚟到加拿大，山聪都有四周围玩下，佢更喺社交平台分享佢喺多伦多游览嘅相片，相中所见，佢去咗古酿酒厂区嘅爱情锁墙打卡，山聪话呢次行程虽然咩都无买，但就品尝咗好多美食，好似必去打卡嘅「龙虾山」、仲有体验喺中餐厅食牛扒等等，真系好有食神啊﹗
山聪完成登台工作后，就可以专注陪伴啱啱升读小一嘅囝囝Jaco开学啦，山聪嘅太太亦有喺社交平台限动，分享阿仔升格做小学鸡嘅相片，就读南区直资名校嘅Jaco，非常醒目，相信佢亦好期待展开小学嘅校园生活呀。
