方媛 任达华 王丹妮 周汶琦 同 翁嘉穗 等一众名人艺人出席时装骚，身穿桃红色裙嘅 林心儿 非常抢眼，原本准备受访嘅佢，未知系咪想避谈姐夫何正德被爆揽女疑云，临时表示唔做访问。
天王嫂方媛就大方分享三宝嘅成长近况，细女上月经已识得嗌爸爸妈妈，令全家人都好开心。对于早前拍综艺节目闹出嘅风波，方媛不欲多谈，问到有冇影响拍摄进度同心情时？佢话「还好，是一个学习过程。」
Louise每次睇骚都会勾起以前做Model行骚嘅回忆，当中印象深刻一次，系佢18岁时喺刘嘉玲同梁朝伟等多位名人前行骚，点知行到天桥中途仆低，正当佢见到坐喺头排嘅嘉玲伟仔想扶佢时，佢就即刻企起身继续行骚，最后获得全场掌声。另外，Louise老公罗孝勇将于年底学成归来，佢都话终于等到老公毕业，一家人都期待老公正式执业。
张与辰日前担任港姐决赛表演嘉宾，佢话当日彩排时发现嘅脚伤已经康复，仲话现场睇决赛原来系好紧张。同场出席嘅仲有 蔡思贝 同 麦秋成 ，一对旧情人前后脚现身，麦秋成话喺后台有见到对方仲有交谈，完全冇尴尬感觉，不过就未睇对方参演嘅电影作品。蔡一凤向赵薇前夫黄有龙追中介费案件早前败诉，近日佢就案件入禀上诉，蔡一凤话事件完全冇影响心情，因为自己生意都好繁忙，加上官司事宜已经交托专人处理。
