陈山聪 相隔6年再次到多伦多开骚，好友 林嘉华 于洋 同 张崇基 都有现身捧场，全场粉丝爆满个个都争住埋身同山聪集邮，众多热情粉丝更送上利是寓意山聪大丰收。
呢晚山聪献唱多首歌曲气氛热闹，特别系唱到凭《金宵大厦》封视帝嘅主题曲《今宵多珍重》时，山聪特别投入。呢晚除咗观众热情支持之外，当地嘅巿长亦惊喜登场献唱一曲《上海滩》似模似样，令观众同山聪都好惊喜。
今次山聪同行仲有一位小师妹 柯雨霏 ，两人同台合唱，Ophelia亦有Solo环节，事前都好紧张担心表现会影响山聪，幸好都顺利完成令Ophelia可以松一口气，而山聪亦大赞对方表现同实力。
嘉华哥同山聪曾经合作过多套剧集《少年四大名捕》以及《飞虎》系列，两人一段时间冇见，所以嘉华哥一定要嚟捧场，并希望一尽地主之谊带山聪游览聚旧，可惜时间关系未能实行。
年届78岁嘅于洋喺加拿大过住退休生活，早前佢接受咗心血管手术，身体已经完全康复，靠勤力做运动养生维持良好体魄。山聪同于洋合作过《金宵大厦》，难得山聪到加拿大，于洋一定要嚟见个面。
