资深演员刘兆铭（Ming Sir）9月2日离世，享年94岁。Ming Sir近年深居简出，甚少露面，晚年受七种慢性疾病困扰，出入靠轮椅代步，而日常生活就由家佣照顾。而喺去年10月出席香港文化艺术界庆祝中华人民共和国成立75周年酒会，就成为Ming Sir最后一次露面，当时Ming Sir坐轮椅现身。
Ming Sir纵横演艺界超过半世纪，醉心舞蹈及戏剧艺术。Ming Sir喺香港土生土长，十几岁为生计喺邮轮上担任仓务员及打杂，亦因邮轮不时停泊喺欧洲、欧美等港口，令佢接触到当地嘅艺术。
Ming Sir喺25岁时正式喺法国学芭蕾舞，凭住惊人嘅天赋同毅力，成为首位获得奖学金，远赴法国康城习舞嘅华人。
为完成梦想，Ming Sir日头做清洁，夜晚负责送餐，亦接触到世界各地不同著名舞蹈家，令佢成为第一位为法国人编舞嘅中国人。Ming Sir回忆记得学舞时，因为骨头硬，经过一年、年半、两年嘅日子先做到膝头贴住额头嘅动作，Ming Sir自言系自己挨出嚟，做到呢个动作时，佢亦流下男儿泪。
Ming Sir喺60年代学成归来，佢创办舞蹈学校，致力推动本地舞蹈艺术，培养人才。佢喺70年代《欢乐今宵》担任舞蹈主任，2001年先后为香港芭蕾舞团演出，2007年更获香港演艺学院颁授荣誉学士荣衔，2017年，Ming Sir喺香港艺术发展奖获得「杰出艺术贡献奖」及最高荣誉嘅「终身成就奖」。
Ming Sir喺1979年教舞时获徐克赏识，继而参演电影《蝶变》，正式踏入影视圈。而喺80年代，Ming Sir加入TVB，喺40多年嘅电视生涯中，参演咗超过100部剧集，凭精湛嘅演技，演活咗无数脍炙人口嘅经典角色。Ming Sir喺剧集《今生无悔》同《新扎师兄》中，将传统保守嘅严父形象演得入木三分。
Ming Sir曾经表示佢同剧中嘅阿仔对戏会特别投入，因为佢嘅囝囝自细就去咗美国，一去就18年，呢18年亦好少机会父子相见，所以每次拍剧见到戏剧中嘅儿子，佢都会觉得好似见到自己阿仔咁，如果自己嘅仔好似佢哋咁叻就好。
除咗严父角色令人深刻，Ming Sir常饰演大反派，当中喺《猎鹰》贩毒集团首脑、《鹿鼎记》亦正亦邪太监海大富，令观众至今难忘。而Ming Sir喺最后一部参演嘅TVB剧集《赌城群英会》系大反派角色，虽然当时佢已年届80几岁，但Ming Sir依然将角色阴险狠辣演绎得淋漓尽致。
Ming Sir喺2013年获《万千星辉颁奖典礼》颁发万千光辉演艺人大奖，同年获特区政府颁发荣誉勋章。而曾同佢喺剧集《七姊妹》合作，饰演两爷孙嘅视后佘诗曼得Ming Sir独具慧眼赞赏演技，阿佘得悉Ming Sir离世后，亦喺网上发文哀悼，写上：「爷爷，奀猪会永远记住你。」而蔡一杰、关宝慧、郭少芸、陈法蓉、何远东、以及同Ming Sir情同手足嘅老拍档刘松仁亦同样表示哀痛。