资深女星南红（苏淑眉）系1950至1960年代红极一时嘅粤剧及粤语片女星，曾与嘉玲、江雪并称「光艺三大花旦」，南红近日接受资深传媒人汪曼玲主持嘅《快拍。曼镜头》专访，分享与已故著名导演楚原长达半世纪嘅婚姻维系之道与演艺往事。
南红与楚原识于微时，二人喺片场埋头开工，交往长达9年先正式结婚，南红爆楚原系大男人，楚原多年从未讲过「我爱你」，亦唔会拖手，南红笑称当时冇人追，彼此工作太忙，喺片场朝夕相对，大家都心知对方系啱嘅人，直到有日南红喺片场拍紧戏，担心二人感情转淡，主动提议订婚。
南红买对戒，订婚当晚二人先瞒住双方家长，只系话约一齐食晚饭，原来系惊喜订婚宴，席间突然拎出戒指，楚原首先问口，告诉父亲张活游，指二人要订婚，当刻张活游与南红母亲亦大吃一惊，后嚟楚原主动求婚。
南红透露二人结婚55年嚟从未嗌大交，秘诀在于「互相迁就、顺从丈夫」，佢自认喺婚姻里系「小女人」，凡事以楚原嘅意见为主，虽然身边有朋友批评佢思想太过落后，南红认为夫妻之间只要性格一强一弱、互相平衡就唔易产生冲撞，若果两个均系强势就唔好结婚。之不过南红赞同新派爱情观，觉得「同居后先结婚」，认为年代唔同，南红话如果佢系现今呢个年代，就拣唔结婚，大家同居就算。
当主持人赞赏南红系非常成功、做得很好嘅太太时，南红更讲幽默玩笑，称自己既可以做「小三」，亦可以做「老婆」， 如果自己做小三，就一味叫佢拎钱，自己就看重钱，因为「做小三就系要钟意钱」 ，但自己拣咗做老婆，就主动让老公，唔计较金钱，夫妻一心为建立温馨小家而共同付出。
南红甜蜜回忆「玫瑰电影公司」由来，指当年公司提出续约，但薪酬太低，无法负担家庭开销，公司折衷改为每年畀佢一部电影嘅配额，南红自负盈亏，由于南红不懂经营，楚原甘愿当军师，主动帮忙操办，担任导演同编剧，南红担当主角，相继拍《黑玫瑰》、《黑玫瑰与黑玫瑰》等 ，南红话虽然冇赚到大钱，却成为彼此共同生活回忆。
南红坦言面对老伴楚原突然离去，屋企得自己一个人时，确实经历一段痛苦、难过嘅时光，自己用咗两年时间，慢慢接受生老病死，学会自我开解，明白自己再难过，老伴都唔会返嚟。现年约92岁嘅南红，先前曾唔小心跌倒两次，目前需要用拐杖代步，但南红心态乐观，认为拎拐杖更稳阵安全，唔介意旁人眼光。