恋爱真人骚《女神配对计划2》今个星期日首播，呢日记者上，金牌媒人林盛斌、上届求爱成功嘅GM曾展望同Sophie叶蒨文，联同今届五位女神何沛珈、郭珮文、陈若思、阮嘉敏及俞可程一齐登场。
阿Bob 话呢次赛制除咗全面升级之外，连求爱勇者嘅质素都抛离上届，之不过，同GM热恋中嘅Sophie似乎对阿Bob呢番言论好不满噃：「爱情呢啲嘢，一个锁匙一个锁，人夹人缘，无话边个好过边个，我就严重质疑Bob哥为咗宣传。」阿Bob即刻解释系以整体质素嚟睇，好似「高度」同「学识」两样。
GM趁机放闪话唔介意，仲好sweet咁话：「我就算高低都无所谓啦，我都有啦。」阿Bob再打蛇随棍上问GM，如果今届再参加，要喺五位女神当中拣一个，GM会点拣，GM就谂都唔谂话：「无Sophie 我唔会参加。」可见二人感情真系打风都打唔甩呀。
面对咁高质嘅求爱勇者，连平日俾人感觉冷若冰霜嘅Julianna，都好似成个人脱胎换骨大解放咁，Julianna就话自己喺表达上仲要努力一下，主播 王镇泉 即刻试用普通话访问，睇Julianna嘅反应会唔会快啲，果然呢一招成功让Julianna好流畅咁表达佢嘅感受呀﹗
要融化Julianna，睇嚟识讲普通话嘅男士就有啲优势，至于想靠近Roxanne嘅勇者，就要收敛下，否则太进取嘅话可能会吓亲佢噃！
