陈慧琳Kelly近日推出新歌要瞓身跳舞，搞到佢嚟紧生日都唔敢去太多饭局，怕玩怆咗个心影响表现。Kelly呢日现身品牌活动时就话一定会同屋企人食餐饭简单庆祝，仲好期待阿仔嘅心意，已经向陪仔表白想要枝唇膏。不过阿仔话冇钱嘅反应就令Kelly好两难，Kelly透露大仔之前补习赚咗二百五十元，但喺母亲节用嚟买花俾佢已经冇晒钱，所以佢唔敢强求，加上最近阿仔应付考试，唔想因为一枝唇膏耽误咗阿仔学业。
Kelly早前到澳洲工作，顺便玩咗几日，最开心系去到海鲜巿场劲食海鲜，一口气狂食咗近12只蟹嘅蟹膏份量，而且只只个壳都好似块面咁大，令佢食得过瘾又滋味，点知返港后就皮肤过敏，胸口同背部起红疹，搞到Kelly都好惊，要食药同拔罐清毒，最大感受系要喺胸口拔罐好痛。
同场仲有刘俊谦Terrance同廖子妤Fish，二人有份演出嘅电影入围釜山电影节，佢哋都希望团队可以一齐参与。而讲到电影，刘俊谦有份拍摄嘅电影系列终章虽然已经煞科，但剧组伙食劣质惹关注，刘俊谦谢绝回应太多，只话食物嘅嘢好主观，佢个人对食物有要求，但对剧组嘅食物不回应，仲叫大家自己揣测。
