慧妍雅集呢日举行月饼义卖活动，前任会长 朱凯婷 同现任会长 岑杏贤 ，以及副会长 邵珮诗 与一众师妹齐齐为慈善出力，今次系岑杏贤同邵珮诗接任正副会长后首个公开活动，佢哋都话希望嚟紧嘅日子，可以将慧妍雅集嘅精神继续发扬光大。
岑杏贤话自己不经不觉已经喺慧妍雅集14年，今年可以以会长身份出席活动，多谢众会员嘅信任，而邵珮诗就话想趁慧妍45周年，做多啲优化嘅嘢，亦想贴近更多唔同阶层嘅事物。而前会长朱凯婷就话每次做慈善活动，可以亲身去接触唔同阶层，觉得好warm。
新一届香港小姐刚刚诞生，两位上届师姐 施宇琪 与 袁文静 就话好开心见证新一届港姐诞生，而 2019年亚军 王菲 就更加兴奋，因为好多人都话今届冠军 袁丝珩 同佢好似样，王菲指赛前已经好多人send过袁丝珩嘅相同片畀佢睇，而佢睇完亦觉得真系几似，特别决赛当日佢喺台下睇嘅时候，有种自己喺台上参选紧嘅感觉。
而施宇琪就话好兴奋可以卸任，兼见证到新一届港姐诞生，佢又指呢段选美经历相当难忘，而现时就可以move on去接受新挑战。袁文静就话呢一年经历咗好多嘢，而自己亦已经转咗做金融工作，不过佢就话如果公司畀机会佢拍剧或者一啲model工作，佢都想试吓。
呢日出席活动嘅仲有2014年季军 何艳娟 ，佢喺2018年同年长 40岁嘅前夫吴志诚离婚后，就少咗亮相幕前，不过佢不时喺社交平台分享富贵生活，呢日佢就同大家预告自己正忙于筹备个人画展，佢就话希望可以同慈善团队合作，搞一个义卖活动。
