低调交往4年嘅2019年香港小姐亚军兼最上镜小姐 王菲 同唱作歌手兼环星娱乐「太子爷」 张子丰 星期五深夜于社交平台惊喜宣布订婚，两人贴出多张求婚相片同长文大放闪光灯晒幸福，向外宣布将携手迈向人生新阶段。
现年30岁嘅王菲形象甜美亲民，佢2019年参选港姐分别夺得亚军同最上镜小姐入行，近年参演过《刑侦日记》、《白色强人II》同《香港人在北京》等多部剧集，亦参与即将首播嘅《死有对证》演出。至于38岁嘅张子丰，于加拿大皇后大学电影系及心理系毕业，除咗系专注前辈歌手唱片同演唱会嘅环星娱乐老板 张国林 之子外，佢亦身为歌手、演员同导演，又自设制作公司执导微电影同MV。
其实两人自2021年合作拍摄剧集《法言人》而擦出爱火，虽然过去一直保持低调，私下经常同框同互相探班，感情极为稳定，走过4年细水长流嘅甜蜜时光。
张子丰为向女友惊喜求婚，特意安排于一处欧式湖畔，以「工作拍摄」为由氹王菲扮靓靓盛装出席。张子丰身穿浅色西装、手捧大束鲜红玫瑰，喺斜阳余晖下加上岸边布置「MARRY ME」气球阵，乘坐布满鲜花嘅小船驶至湖中央，单膝跪低送上圆形巨钻戒指求婚，王菲亦感动答应，于一早到场嘅亲友见证下深情拥吻，场面既浪漫又温馨。
事后两人又分别于社交平台分享感受，真系甜到漏呀，准新郎张子丰写道：
时：日落前景：湖中央一条船上人：张子丰、王菲
张子丰：妳愿意嫁给我吗？王菲：我愿意。
(2026.08.08)
💍 曾经觉得人生好迷茫，但系妳嘅出现，令我知道原来生活系可以好开心、好幸福咁过。然后有一刻，我知道呢个就系我想一齐过一世嘅人。我觉得，一定系个天派咗个天使落嚟俾我。
由最初好习惯自己一个人生活，到而家自己一个人瞓会有啲淆底、一个人起身又有啲唔惯。好享受每一次二人世界，每个Weekend揾地方玩、揾地方探索、揾戏睇，要一齐睇晒全世界嘅戏。
以前成日有一个唔知屋企系边嘅感觉，而家知道，边度有妳有我，边度就系屋企。
「余生多多指教」呢啲老土嘢唔讲喇，总之以后我哋两个拍住上，一齐继续进步、继续成长；一齐去探索呢个世界、感受每一分每一秒，精精彩彩咁过埋余下嘅人生。
而甜蜜应承嘅待嫁新娘王菲，亦分享同张子丰将成家立室嘅心情：
I said Yes💍❤️记得刚认识你嘅时候，我就话过你成日懒有仪式感😌果然到求婚呢日 都继续贯彻你嘅仪式感但今次 我中意😎🥰
白羊座系一个超级三分钟热度嘅人（至少我系🙊）但对住你每日都唔厌 想痴住揽住每当有烦恼唔想理 就会萌生「想两个人一齐逃离宇宙」嘅想法🤣所有嘢可以好简单好平凡好似只要两个人一齐就乜都搞得掂一齐放肆食一餐 一齐睇套好戏就可以令我哋开心全日😌
好记得有次聚会我哋有个男性朋友揽住你搞笑地讲「张子丰同我一齐啦！」然后你突然间好严肃地讲「唔得㖞！因为只有同王菲一齐嘅张子丰先系the best version 嘅张子丰！所以我冇可能离开佢！」个下，默默地好感动🥹
我谂我呢世人应该唔会再遇到一个我咁爱而又咁爱我嘅人当身边所有人都同我讲「呢个人真系好好」嘅时候我想讲「系啊我知啊！所以我拣啱咗啦！」
往后人生，合作愉快🤝🏻💗