谢安琪 吴若希 陈桢怡 黄建东 朱鉴然 胡子彤 等艺人呢日现身时装活动，阿Kay早前陪囡囡飞到美国参与街舞比赛兼享受母女二人世界，返到香港继续捧囡囡嘅舞蹈表演场。阿Kay感叹小朋友真系大得好快，所以无论囡囡去边，佢都想一齐分享难忘回忆，加上大仔细个时事业好忙，好似错过咗唔少重要时刻，而家囡囡亦就快升中学，所以佢想更珍惜呢啲亲子机会。
阿Kay仲笑言，老公 张继聪 因工作未能同行美国之旅，所以喺囡囡呢次舞蹈表演，自己就让咗一个靓位俾佢坐。
黄建东 日前被影到同梁凯晴、罗天宇及陈懿德四人行睇骚，除咗天宇被拍到揽实德德离场，阿东同Carina亦被指疑似拖手拍拖。Carina虽然已作澄清，不过东东喺呢日都有再解释一次，当日系一班人一齐睇骚，所谓拖手只系咁啱角度问题，大家只系好同事。讲到天宇同德德，阿东就话自己冇点留意身边人只专注睇骚，但佢就赞天宇系绝世好男人，至于其他嘢就交返俾当事人回应。
Jinny虽然投入拍摄处境剧《爱．回家之三代同糖》，佢就话拍处境剧嘅收工时间好稳定，每晚8点前都可以返到屋企同仔女相处，加上囝囝即将考小一会有好多需要面试嘅时候，公司都帮佢迁就时间，等佢可以出去面试。
关嘉敏 同 陈星妤 都好开心可以捧场本地时装盛事，讲到恋爱综艺节目《女神配对计划2》将会加入隐藏女神，作为第一季女神嘅Carman话亦已经见过隐藏女神，觉得几有大挑战性。而Carman仲向节目组推荐过星妤参与节目，星妤自认怕丑，不过唔系抗拒呢种机会，如果收到节目组邀请都愿意玩，当做识朋友。
