剧集《夫妻的博弈》日前播出大结局，喺剧中饰演高海宁闺密之一嘅 何沛珈 就喺社交平台分享多张花絮照分享感受，喺Roxanne分享嘅相片中，包括佢哋几个女仔嘅搞鬼自拍同埋锡面相，仲有剧中闺密团相拥而泣嘅场面，可见剧里剧外佢哋都系好姊妹。
Roxanne更感性撰文：「感恩遇上这几位充满爱的女孩子，无论系戏内戏外都感受到大家的互相支持，林美淇的故事完结，但很庆幸现实中和你们的故事仍在继续。」令网民都话好开心见到佢哋嘅友谊延续到剧外，更大赞剧情精彩。
而另一位收获观众好评嘅仲有饰演马国明大嫂嘅陈熹潼。
陈熹潼 被观众赞赏将大嫂嘅神经质同怨妇眼神诠释得淋漓尽致，更认为佢可以角逐「最佳女配角」奖项。面对观众嘅喜爱，陈熹潼都觉得感恩同感触，所以喺结局后佢亦写长文感谢剧组以及剧中老公 黄智贤 带领，佢更感激一位观众写咗一篇几百字嘅文章鼓励佢积极拍片，令佢有所改变。
陈熹潼仲透露，自己用咗一年时间思考自己系咪适合做演艺圈，仲话：「如果从头再拣，我会做医生，一定唔会做呢一行。」因为做演员好被动，需要被监制赏职：「经过20年嘅验证，我发现自己应该冇乜演员命。用尽洪荒之力，仍然好似喺起点踏出一两步。天生食呢行饭嘅人，系俾人推住背脊走嘅。所以我承认咗，接受自己天生唔系食呢行饭嘅人。」随剧集播出，开始有人嗌出佢全名，令佢再度纠结自问：「因为原本已经准备好离场，而家又系自欺欺人嘅假象吗？要继续踩返入坑入面吗？」
再加上佢有份参演嘅新剧《死有对证》即将播出，佢形容：「戏份系正式加入TVB四年以来最多嘅一次，都可以话系我最欠缺嘅「入屋」机会。」令佢开始觉得要且行且珍惜，仲话：「前路，我唔知应该点样走，但此刻只系充满感恩、感谢同珍惜。我只系星河入面好平凡嘅一颗小星星，但都希望我嘅光能够隐隐被你看见，抬头看见我也曾经努力发光发亮过。」
《死有对证》今晚起 星期一至五晚 20:30 翡翠台