陈汉典 陈庭妮 日前亮相第61届金钟奖主持人公布记招，呢次汉典同庭妮分别担任节目类主持人同戏剧类主持人，汉典更系接老婆Lulu棒，所以佢嘅心情既期待亦紧张。汉典就话当佢接到邀请时第一时间同老婆分享，Lulu觉得呢个时间点实在太好，所以鼓励佢答应邀请，仲话好期待佢同庭妮嘅表现添。
呢次记招系庭妮产后首度公开现身，庭妮就话，做咗妈妈后时间变得破碎，不过对住BB完全冇陌生感，加上同老公胡宇威都系准备好迎接新生命，所以认为囡囡嘅到来系最好嘅事。至于囡囡似妈妈多啲定系爸爸多啲？庭妮笑言自己嘅基因比较懒，囡囡似爸爸多啲。不过最好笑系，当庭妮话囡囡唔难凑时，汉典讲咗句「感觉是天使宝宝」，令庭妮好尴尬话，保姆提醒最好唔好讲呢句，令汉典都即刻讲对唔住。
汉典同Lulu婚后，不时就会被问到造人进度，呢日都唔例外。汉典就话一切交由上天安排，佢哋屋企开放自由报名，男女不拘、人数不限，如果有BB觉得佢哋屋企好玩想嚟，都无任欢迎。虽然汉典对呢种问题做好准备，答得搞笑，但都听得出佢好无奈。
