恋爱真人骚《女神配对计划2》一开播即引爆话题，日前播出海选中嘅「花生」片段，唔少观众睇完都赞今季嘅「求爱勇者」相当高质，其中最吸睛嘅「求爱勇者」非26岁的方智弘（Oscar）莫属！
拥有葡萄牙、芬兰及香港三国混血基因嘅Oscar，五官深邃立体，更被指撞样TVB男神吴伟豪。不过最令观众估佢唔到嘅系，呢位超高颜值嘅混血型男，正职竟然系一名「冷气技工」，片段播出后瞬即被网民封为「全港最靓仔冷气技工」！
重温《女神配对计划2》参考者勇敢求爱
Oscar喺节目中透露，自己喺18岁时入行，无论是窗口式、分体式定系天花中央冷气，安装与清洗都难佢唔倒，睇到 关嘉敏 当场「流晒口水」，话想睇对方洗冷气。
节目播出后，各地都出现坏冷气情况，网民纷纷留言：「马上全香港的冷气都坏晒」、「大湾区冷气都坏埋」、「深圳要洗冷气」、「哇塞，好靓仔！过来广州洗冷气」，亦有人睇好Oscar：「2368个粉丝，预判一个月后至少翻10倍」、「郭富城未做艺人前，都系冷气技工啊，所以加油」。当然亦有人深挖呢位「最靓仔冷气工」嘅背景，原来Oscar系二人男子组合 OneUp 嘅成员，更曾夺得「叱咤乐坛生力军组合歌手铜奖」。
