张卫健（Dicky）出道几十年来经历过高低起伏，当年落难时曾接受他人帮助，Dicky后嚟积极回馈社会，加上Dicky喺《西游记》嘅孙悟空形象一直深入观众心，尤其系「大圣爷」对一众猴子猴孙疼爱有加。跳出戏外，Dicky唔只爱锡粉丝，仲好暖心好有义气！
近日有人喺社交平台出Post发问：「哪一个偶像是支撑你走过低潮的呢」，吸引唔少粉丝留言分享与偶像相处嘅故事，有人留言「国中被霸凌很痛苦的时候遇见了AKB48，成为了带我走过那段时期的救赎」、「张学友陪我渡过31年和往后的每一天！我的整个人生都是学友」，有人鬼马分享佛像同纸币图像，不过就有一位Dicky嘅粉丝撰文，分享Dicky为佢嘅朋友所做嘅事，非常感人。
粉丝「dickyjesscheungfanpage」就话：「张卫健，幸好全程从头到尾都有佢陪伴，冇谂过连最后嘅扶灵火葬都做埋。虽然低潮算唔上，但一定系人生最难挨过嘅日子，仲专登重录清唱咗十几首，朋友想听，但佢有N年冇唱过嘅歌俾佢听，朋友去唔到睇佢嘅演出，录晒片俾朋友睇。短短一年朋友生病➡️做手术➡️康复期➡️突然恶化➡️疼到冇药救➡️沉睡中等待离开➡️回归天国➡️告别仪式。介绍大神父帮忙，关心朋友的家人。当佢再次踏上舞台唱身体健康，仲特意手向天一指，话送俾朋友听。谂返起𠮶时真系好难受好难挨，感谢张卫健。」
唔少网民睇完呢篇短文觉得好感动，仲纷纷留言大赞Dicky人品好，做事不求回报，果然系至情至圣，亦有人话「近年佢比较低调，原来佢咁有心」，粉丝回复指Dicky一直有做慈善，只系低调唔讲，最后佢再分享一件事，「有粉丝的爸爸急须众筹做手术，佢知道都即刻捐款了，虽然最后都系太严重走了」，令大家再了解到Dicky行善嘅低调作风。