73岁B哥哥钟镇涛日前联同杨谨华及刘以豪强势合体组成「跨世代武林三巨头」，三人打破常规，首度以英气逼人嘅「古装武侠」造型现身拍摄广告。B哥哥近年依然保持殿堂级状态，喺广告中身穿一袭气势磅礴嘅宗师袍，一出场便带有「武林盟主」嘅强大气场。
B哥哥透露呢次会答应接拍广告，背后原来藏有一段鲜为人知嘅「神兵疗伤」故事，B哥哥回忆：「因为之前温拿举行告别巡回演唱会广州站𠮶时，舞台上啲干冰太湿滑，我就不小心跌倒，当场整伤咗「膝头哥」同埋髋关节。演唱会之后，其实我一直有做物理治疗,但膝盖关节啲伤势一直好反复，始终未完全康复，至有时会影响埋我日常走动。」B哥哥后嚟接受Pilates训练，喺专业教练指导下，进行深层肌肉训练，竟然奇迹般帮助咗佢全身嘅骨骼同关节健康重建，连原本劳损僵硬嘅膝头哥都「好返晒」，而家灵活自如！
B哥哥年届73岁起初担心做唔到一啲高难度嘅拉筋动作，但在器械及教练嘅配合下，B哥哥简直俨如一位武林高手，做甚么动作都挥洒自如，而B哥哥健康体魄，亦得到广告商垂青，诚邀B哥哥担任今次产品代言人。
杨谨华一直系B哥哥好朋友，能够与老友一齐拍广告，B哥哥份外开心：「我同谨华好老友，今次能够同佢一齐拍广告，真系正。至于刘以豪就真系第一次合作，同我一样又靓仔又高大，哈哈哈！本来广告商想我演一个霸道总裁，但我就觉得武林高手好玩啲，因为我好少拍武侠片，想做大侠过吓瘾。」
