陈晓华主演嘅新剧《死有对证》正式开播，Hera连日嚟亦积极出席宣传活动。不过喺星期一（9月7号），Hera喺商场活动就遇上激动狂迷，虽然Hera疑似受惊而眼泛泪光，但佢一个举动就得到网民大赞有港姐智慧、EQ非常高。
从网民分享嘅片段可见，当时活动吸引大批粉丝支持及途人围观，Hera喺准备离场时突然有一位身形魁悟嘅灰衫大叔激动向前推撞，继而同另一位身穿粉色衫嘅男士发生肢体冲突，即使在场保安当场阻止，粉衫男士最后被推跌在地。
Hera虽然因冲突疑似眼湿湿，但佢亦表现得处变不惊，喺工作人员保护上前了解并想出言劝阻平息纷争，不过灰衫大叔见到偶像情绪更激动，大叫「Hera」后再企图靠近，并表示自己想合照及递上礼物，经工作人员协调及Hera温和安抚后，大叔情绪稍微冷静，最后Hera喺工作人员保护下，同呢位大叔合照。
影片喺社交平台疯传后，唔少人大赞Hera EQ高，化解方式都好有港姐风范，不愧系港姐冠军，而Hera亦以短讯回应传媒，表示「最紧要大家都冇事」，有人认为Hera唔应该同大叔合照，因为担心有人会「有样学样」，喺追星现场为达目的而吵闹，更有人重提官恩娜被狂迷强吻一事，认为工作人员需要小心。
